Sabtu, 27 September 2014

Alihaksara Prasasti Mantyasih Sisi Verso

Gambar prasastinya bisa dilihat di sini.

  1. mandul kapua winaiḥ pirak mā 2 wḍihan hlai 1 sowaŋ sowaŋ || maṅla si kira ta rama ni bhāsitā ‘ muaŋ si butir ‘ mawuai si busū rama ni garagasī ‘ muaŋ si rubiḥ ‘ kapua winaiḥ pirak mā 2 sowaŋ sowaŋ || sapra-
  2. kāra ni saji saŋ makudur iŋ maṇḍala inmas piṇḍapāmasanya su 2 mā 2 ku 3 i sampunniŋ mawaiḥ pasĕk pasĕk manaḍaḥ saŋ wahuta hyaŋ kudur ‘ muaŋ wadwā rakryān saŋ pinaka paṅuraŋ ‘ muaŋ patiḥ wahuta rāma i tpi
  3. siriŋ kabaiḥ || lwir niŋ tinaḍaḥ hadaṅan ‘ wők ‘ kidaŋ ‘ wdus ‘ ginaway samenaka ‘ muaŋ saprakāra niŋ haraŋ haraŋ ḍeŋ hasin ‘ ḍeŋ hañaŋ ‘ ḍeŋ taruŋ ‘ muaŋ huraŋ halahala hantrīṇi ‘ i sampun niŋ manaḍaḥ maŋḍiri saŋ makudu-
  4. r lumkas manapate ‘ mamantiṅakan hantrīṇi ‘ manawurakan hawu ‘ manĕtĕk hayam ‘ i hapgapan ‘ wadwā rakryān muaŋ patiḥ wahuta rāma tpi siriŋ kabaiḥ || līŋnira rpanapate || īndaḥ kamuŋ hyaŋ pūrwwa ‘ da-
  5. kṣiṇa ‘ paścima ‘ uttara ‘ sakwaiḥ ta hyaŋ i ruhur ‘ i sor ‘ iŋ maddhya tasak lagi lagi ‘ sumpaḥ lĕ[mĕ/mī][ra] palar ‘ iŋ paŋ lilir ‘ itiṅhalta ‘ nihann aku sumawak kita ‘ nihann aku sumaṅguḥ kita ‘ nihann aku lumamun kita a-
  6. kutat sinaṅguḥ ‘ akutak linamur ‘ tan kumuā līṅanta ‘ sinawakku kita kabaiḥ ‘ sinaṅguḥku kita kabaiḥ ‘ linamunku kita kabaiḥ tā hiniyakanku ‘ kopamuṅuan ‘ simniŋ hulun sīkiṇḍaŋ jual ‘ si pakawakan ‘ ta-
  7. sak rahyaŋ ta rumuhun ‘ ri saraŋ bāsa i wanua ‘ saŋ maŋdyur ‘ kahyaṅan ‘ saŋ makagawai kaḍatwan ‘ saŋ magalaḥ galaḥ pomahan ‘ saŋ tumaṅgőŋ susuk ‘ saŋ tumkeŋ wanua gaṇa kadi laṇḍap nyun ‘ pakaśapātha kamu ‘ rahyaŋ-
  8. ta rumuhun ‘ ri mḍaŋ ‘ ri poḥ pitu ‘ rakai matarām ‘ saŋ ratu sabañjaya ‘ śrī mahārāja rakai panaṅkaran ‘ śrī mahārāja rakai panuṅgalan ‘ śrī mahārāja rakai warak ‘ śrī mahārāja rakai garuŋ ‘ śrī mahārāja rakai pikatan ‘ 
  9. śrī mahārāja rakai kayuwaṅi ‘  śrī mahārāja rakai watuhumalaŋ ‘ lwiha saṅkārikā laṇḍap anyur pakaśapātha śrī mahārāja rakai watukura dyaḥ dharmmodaya mahāśambhu ‘ ikaiŋ patiḥ ‘ wahuta nāyaka lampuran ‘ muaŋ
  10. rāma ni tpi siriŋ kalaŋ gusti wariga winkas kalimaśama marakā rare matuha manwam ‘ kapua tumohana tpitnya kyan alaṅalaŋ bhaktinya ‘ kyan ulahulaha ikaiŋ sīma patīy-anyaya ‘ de y-anyu ipatī ya ‘ tepano-
  11. liha i wuntat ‘ te tiṅhala i likuran ‘ apan hana rakarayān mapatiḥ wlahan ‘ makudurta humaṅuyut ‘ umaraha kamu i denyun pamatī ‘ de y-anyu ipatī ya taruŋ ryy-ādagan ‘ tampyal iŋ paluguhan ‘ saŋ kākan 
  12. i likurĕn ‘ kaḍawuḥ tĕhĕr tutuḥ tuṇḍunya ‘ siwak hulunya kakőg ulunya ‘ waltaḥ pahuṅnya ‘ rantan usūsya ‘ ḍuḍut hatinya ‘ paṅan dagiṅnya ‘ inum raḥnya ‘ te patua [jda]tna ya ‘ te patiṅgĕakna ya ‘ te pākara- 
  13. kna ya te paśeṣakna ya ‘ paṅan tihĕr pĕpidakan ‘ wkasan hawu kerir ‘ yan aṅwaŋ umulahulaḥ ikaiŋ sīma sinusuk niŋ kudur || īndaḥ kamuŋ hyaŋ hayam tulihuliḥ  kawuitanyu ‘ wulun piliḥ sara-
  14. nolu mirik tuhān wnaŋ ‘ hantlū ko tan kaguliḥ ‘ tumitik ko tan cūkan ‘ maṅliheŋ ko riŋ osuŋ tan palu koŋ manutu ‘ tan katibāna halu ‘ maṅliṅai ko riŋ tgal tan samwar ko luṅuluŋ ‘ tan sikap koṅ ala-
  15. palap ‘ matuha pua ko ‘ apan dineniŋ hyaŋ paŋrāha śapatha ‘ pamisĕṅĕta ‘ tasak lagilagi sumpaḥ lĕmĕḥ palar umatī yan aṅwaŋ umulahulaḥ ikaiŋ sīma sinusuk niŋ kudur || tasmat kabuataknanya kadyāka-
  16. nikanaŋ hayam ‘ mati tan pakasaṅkān ‘ mati tan pakawuītan ‘ makihawas mamaṅan maṅinum ‘ maṅkana hamĕṅana ‘ nikanaṅ waŋ umulahulaḥ ikaiŋ sīma sinusuk niŋ kudur || tasmat kabuata knanya kadyāganika-
  17. nahan tlūwuŋ ‘ tan waluy i lwirnya ‘ maṅkana hamĕṅana nikananaŋ ṅwalwur ikaiŋ sīma sinusuk niŋ kudur || īndaḥ kamu hyaŋ ñāla kamuŋ hyaṅ-apuy ‘ kadi lwirnya itunu ikaiŋ wataŋ kayu sakāgőgāṅan ‘ te patőṅgrĕ-
  18. ākna ya ‘ te pākarakna ya ‘ te paśeṣakna ya ‘ paṅan tihĕr pĕpĕdakan ‘ wkasakan hawu kairir ‘ maṅkana hamĕṅana nikananaŋṅ walwur ikaiŋ sīma sinusuk niŋ kudur || īndaḥ kamuŋ hyaŋ maṅalū kamuŋ hyaŋ ta-
  19. ṇḍaŋ lwaḥ kamu hyaŋ ulā sarpa ‘ kamuŋ hyaŋ caduŋ saŋ hyaŋ ‘ ikai mataṅyan winaŋmaŋ inuyutan ‘ umatī yan aṅwaŋ umulahulaḥ ikeŋ sīma sinusukniŋ kudur ‘ yan umara ya iŋ lwaḥ hanawu hayam-aṅalu sumaṅhapa ya ‘ sumilamakna ya ‘ 
  20. raha[yu]n mati kapisan mawūka tan tmua sama ‘ yan aṅwaŋ umulahulaḥ ikaiŋ sīma yan umara ya riṅ-alas hana ulā umatuka ya ‘ rahayun mati kapisan mawūka tan tmua
  21. pinaduluran wanwārakryān sinusukniŋ kudur || i sampunyan maṅkana umuwaḥ ya i ronya ‘ nahan cihnanyan mapagĕh nikanaŋ wanua i mantyasiḥ muaŋ iŋ kuniŋ kagunturan inanugrāhākan ri kunaŋ patiḥ mantyā-
  22. siḥ sīma kapatihana ‘ yāpuan hana umulahula ya dlahaniŋ dlaha ‘ muaŋ yatannaṅgā ikanaŋ patiḥ magantyagantya sānak pañcamahāpātaka paṅguhanya ‘ mataṅya kayatnāknanta sonin ikaiŋ praśāsti yathā-
  23. nya swastha || paṅgaṅan ri pasukkan i rakryān mawanwa pirak kā 1 i wak ri pannay tujuŋ hijo bakul pajuru pirak dhā 4 || likhita citralekha i walaiŋ punta tarka ||0||


Tidak ada komentar:

Posting Komentar